本周一晚上，我吃着晚饭，一友人突然来电“骚扰”。
友人：喂，娄啊，上海男篮个新闻侬看到了伐？篮协搿趟手脚哪能介快啦？处罚决定已经出来啦？辣手哦......直接取消比赛资格伊讲......
我：介大桩事体当然需要快速处理咯，否则上海对深圳额比赛今朝夜里就要开始来。
友人：哦，迭额倒是呃......但是，我想问侬呀，处罚决定里厢讲上海男篮消极比赛，迭额算啥啦？勿是侪讲是假球吗？哪能一歇歇又变成消极比赛了啦？
我：唉呀，阿哥啊。迭额侬就勿晓得来，篮协只有用“消极比赛”来定性才可以快速处理呀......假球？侬以为假球介便当就好查清爽啦？证据呢？通话录音？对话记录？银行转账记录？
友人一时语塞。
我接着说：就是因为假球额证据勿可能介快就查清爽，所以篮协只好蹲了处罚决定里厢讲“经查核。上海久事队第二场消极比赛情况属实，苏州肯帝亚队第三场消极比赛情况属实”。至于是勿是假球，有勿有证据，迭额是另外一桩事体。对篮协来讲，快速处理快速解决，拨大家一个交代最重要......
友人：啊？弄到最后就是有勿有证据勿重要，重要额是讲侬消极侬就是消极咯？
我：“不杀不足以平民愤”，侬懂勿啦？上个礼拜第二场比赛之后就已经传出来讲双方打默契球额消息，讲上海队存心输脱。为啥啦？为了让自家额美国后卫多消耗一场停赛处罚呀......侬讲讲看，篮协听到迭额消息紧张吗？假使第三场比赛苏州赢了，或者上海狂胜，个么大家呒没闲话讲。现在呢？第三场比赛最后一分多钟难看相来！乃么媒体舆论一枪头爆发，篮协阿是要昏过去？
友人：唉，又是迭只套路，“从重从严从快”......每趟侪是搿能介，稍微碰着点事体么就开始紧张，紧张好了么就开始拍脑子......
我：哈哈哈，朋友啊，阿拉此地么一直是迭能介额呀......侬以为是意大利人当年处理尤文图斯“电话门”事件？首先是监察机关掌握了尤文总经理额电话录音，接下来再开始调查。再正式立案，最后再通过法庭来判决......
友人默然......
我：当然咯，早点处理总比勿处理要好咯......侬老兄还记得20年前足协阎主席吗？“要做好出事、出大事的准备！”
友人：嗯，是额呀，矫枉难免过正......
